Shugaba Bola Ahmed Tinubu ya ce ‘yan Najeriya sun fara samun rangwamen kuɗin sufuri, yayin da gwamnati ke shirin ƙara rage kuɗin sufuri daga ranar 1 ga Oktoba, 2026.
Tinubu ya ce bayan ganawarsa da gwamnonin jihohi 36 a ranar 27 ga Agusta, an kafa shirin National Affordable CNG Transit Programme domin samar da sufuri mai rahusa. Ya bayar da misalai daga Borno, Kaduna, Oyo, Adamawa da Enugu, inda ya ce amfani da CNG da motocin lantarki ya taimaka wajen rage kuɗin sufuri.
A Abuja, shugaban ya ce haɗin gwiwar gwamnati da NURTW ya samar da rangwamen kuɗin sufuri da kashi 40 cikin 100 a wasu hanyoyi. Ya ce kuɗin tafiya daga Area 1 zuwa Gwagwalada ya koma Naira 900 daga Naira 1,500, Nyanya ya koma Naira 420 daga Naira 700, yayin da Wuse ya koma Naira 240 daga Naira 400.
Tinubu ya ce sama da motoci 120,000 ne aka riga aka sauya zuwa amfani da CNG, tare da cibiyoyin sauya motoci sama da 400 da tashoshin CNG sama da 90 a faɗin ƙasar. Ya buƙaci gwamnatocin jihohi da su ƙara haɗin gwiwa da masu sufuri domin tabbatar da ƙarin rangwamen kuɗin sufuri daga ranar 1 ga Oktoba.
